உங்களுக்கு என்ன தோணுது?

ரோட்டுக்கடை மாங்காப்பத்துக்கு,
கொடுத்த காசு ரெண்டு
எடுத்த பீஸு மூணு, கெழவிமேல
பாவப்பட்டாச்சும் திருடாமலே இருந்திருக்கலாம்,

வெங்கடாசலம் வாத்தி, அம்மாவாசை வந்தா,
சிக்குறவனை எப்பிடி பின்னி-பெடல்
எடுக்குமுன்னு ஸ்கூல் ஆண்டுவிழாவில்
மோனோஆக்டிங் செய்யாமலே இருந்திருக்கலாம்,

மலைமேல ஏறுனோமா, சாமியை கும்பிட்டோமா,
ஊத்து தண்ணீல தலைய நனைச்சோமான்னு
இல்லாம, கூட படிக்கிற பிள்ளைக பேரையெல்லாம்
பாறையில அகரவரிசையில எழுதாம இருந்திருக்கலாம்,

பீஸுகட்ட கடைசிநாளுன்னு
காசு கொண்டுவந்த அனிதாவோட
பர்ஸ்ச ஒழிச்சிவைச்சு
அரைபூட்டுக்கு அழவிடாமலே இருந்திருக்கலாம்,

சளிபிடிச்சிருக்கு மாமா, மருந்து
சொல்லுன்னு வந்த சுரேசுக்கு, பக்கார்டி
ரம்மு அரைபாட்டில் – சுடிதண்ணியூத்தி
குடிக்கலாமுன்னு சொல்லாமலே இருந்திருக்கலாம்,


இருந்திருக்கலாமுன்னு எப்ப தோணிச்சு?,

அக்கா பையனுக்கு புத்திசொல்லயில,
ரோட்டுகடை கிழவிட்ட மாங்காதிருடி
தின்னவன் தானநீன்னு அக்கா சொன்னப்பயும்,

மோனோஆக்டிங் பண்ண சொன்னா,
ஓவராக்டிங்கா பண்ணுற நீன்னு
வாத்தியெல்லாம் ரவுண்டுகட்டி அடிச்சப்பயும்,

கூடபடிச்ச பிள்ள, அதோட மூணுவயசு பொண்ணுகிட்ட
“மலைக்கோயில் பாறையில எம்பேர பாத்தியே,அதை
எழுதுனது இந்த மாமா தான்”ன்னு அறிமுகப்படுத்தினப்ப,


கூடபடிக்கிற பிள்ளயோட பணத்தை
ஒழிச்சி விளையாடுறயா-ன்னு
ரெண்டுநா சஸ்பெண்டு ஆனப்பயும்,

மூணுமணிவரை தண்ணியடிச்சிட்டு,
டீ குடிக்கணும் நீயும் வான்னு சுரேசு,
எல்லார் தூக்கத்தை கெடுத்தப்பயும்,

இதெல்லாம் செய்யாமலே
இருந்திருக்கலாமுன்னு தோணுது.

உங்களுக்கு என்ன தோணுது?